په کابل کې د ۳۴ میلیونه ډالرو په پانګونې لوی سوداګریز کمپلکس پرانیستل شو
دغه نهه پوړیزه سوداګریز مرکز په څه کم درې کلونو کې جوړ شو.
د اسلامي امارت لوړ پوړو چارواکو چې د پرانستې په مراسمو کې یې ګډون کړی وو، د هیواد د اقتصاد په پیاوړتیا کې د دې پروژې پر اهمیت ټینګار وکړ.
د صدراعظم د دفتر اداري مرستیال عبدالسلام حنفي په دې مراسمو کې وویل چې د دې پروژې لپاره ځمکه دولتي ده او کمپلکس د سن سکای ګلوبل شرکت له خوا جوړ شوی دی.
حنفي د پرانیستې په ترڅ کې وویل: "ټول عواید به په لاندې ډول وویشل شي: 30٪ د اماراتو چارواکو لپاره او 70٪ د اغیزمنو اشخاصو او پانګوالو لپاره."
د لومړي وزیر د دفتر رییس، عبدالواسع خادم وویل: "په دې سوداګریز مرکز کې د بانکونو، د اسعارو د تبادلې دفترونو او نورو سوداګرۍ لپاره وقف شوي ځایونه شامل دي."
په همدې حال کې د کار او ټولنیزو چارو وزارت سرپرست عبدالمنان عمري د بېکارۍ په راکمولو او د کاري فرصتونو په رامنځته کولو کې د دا ډول پروژو اهمیت په ګوته کړ.
عمري څرګنده کړه: "په داسې حال کې چې افغانستان د بېکارۍ له لوړې کچې سره مخ دی، د دا ډول پروژو بشپړېدل ډېرو هېوادوالو ته د کار زمینه برابروي."
په ورته وخت کې د دغه سوداګريز کمپلکس جوړونکي څرګنده کړه، چې دوی ګڼې لويې پروژې تر کار لاندې لري. پدې کې شامل دي:
د افغانستان په شمال کې د تیلو د پروسس یوه لویه فابریکه
په کابل کې د سرطان او پښتورګو د ناروغیو د درملنې لپاره ځانګړی روغتون
په ټولیز ډول به په دغو پروژو کې تر ۵۰ میلیونو ډالرو زیاته پانګونه وشي.
محمد حنیف حلیمي، چې د پروژې یو تن مسوول دی، څرګنده کړه: "موږ پلان لرو چې د نفتو د تصفیې یوه عصري فابریکه په لوړ نړیوالو معیارونو جوړه کړو، چې د ۲۵ میلیونه ډالرو لومړنۍ پانګونې سره به په پای کې ۳۵ میلیونه ډالرو ته ورسېږي."
دغه سوداګریز کمپلکس، چې له ۱۸۰۰ څخه زیات موټر ځای پر ځای کولای شي، یو لوی جومات او پرمختللي تاسیسات هم لري. دا د 30 کلونو لپاره د دولت او خصوصي سکټور لخوا په ګډه کار کوي.
Comments
Post a Comment