محمدنبي له ایرانه له راستانه شوو کډوالو سره یو میلیون افغانۍ نغدي مرسته وکړه
د افغانستان د کرکټ ملي لوبډلې لوبغاړي محمدنبي له ایرانه هېواد ته له راستانه شوو افغان کډوالو سره د خپل خیریه بنسټ له لارې یو میلیون افغانۍ نغدي مرسته کړې ده.
محمدنبي پر خپله فېسبوکپاڼه لیکلي: «نن مې د خپل خیریه بنسټ، نبي خیریه بنسټ له لوري له ایرانه پر راستانه شوو افغان کډوالو باندې یو میلیون افغانۍ مرسته ووېشله، دا زما د بنسټ د مرستو پیل و او انشاالله دا بهیر به روان وي.»
نوموړي ویلي چې د کابل په یوه کمپ کې یې د کډوالو وضعیت له نږدې لیدلی او حالت یې نازک بللی دی. هغه له افغان سوداګرو غوښتي چې د دغو کډوالو ناوړه وضعیت درک کړي او له هغوی سره مرسته وکړي.
هغه زیاته کړې: «د افغانستان له ګاونډیو هېوادونو غواړم چې د افغان کډوالو پر وړاندې ناوړه چلند پای ته ورسوي او د ګاونډیتوب او د مهاجرت نړۍوالو اصولو په مبنا چلند غوره کړي.»
د یادونې ده، ایران له څه مودې راهیسې له دغه هېواده د افغان کډوالو اخراج پیل کړی او په شاوخوا یوه میاشت کې څه باندې ۷۰۰ زره افغان کډوال هېواد ته راستانه شوي دي.
Comments
Post a Comment