اندري بیلوسوف چې په دې وروستیو کې د ولادیمیر پوتین له خوا د روسیې د دفاع وزیر په توګه ټاکل شوی، د تاجکستان او افغانستان پر پوله د امنیتي تدابیرو د زیاتولو غوښتنه کړې ده.
اندري بیلوسوف چې په دې وروستیو کې د ولادیمیر پوتین له خوا د روسیې د دفاع وزیر په توګه ټاکل شوی، د تاجکستان او افغانستان پر پوله د امنیتي تدابیرو د زیاتولو غوښتنه کړې ده.
هغه افغانستان په منځنۍ اسیا کې د بې ثباتۍ اصلي سرچینه وبلله او ویې ویل: "موږ په لومړۍ کرښه کې یو."
بیلوسوف د جمعې په ورځ په الماتی کې د ډله ایزو امنیتي تړونونو د سازمان (CSTO) دفاعي شورا په ۸۳مه غونډه کې خبرې وکړې.
د روسیې د دفاع وزارت له خوا په خپره شوې خبرپاڼه کې ویل شوي، هغه په افغانستان کې د یو شمېر سخت دریځو ډلو له خوا پرله پسې ګواښونه په ګوته کړل چې په ګاونډیو جمهوریتونو کې د خپلو ایډیالوژیو د خپرولو هڅې ګړندۍ کوي.
د دفاع وزیر د افغانستان له پولو هاخوا د تروریستي ډلو د پراخیدو د ګواښ په اړه خبرداری ورکړ او د سیمې په ځانګړې توګه د تاجکستان او افغانستان د پولو په اوږدو کې یې د ثبات د ټینګښت لپاره د پرله پسې بیدارۍ او پر وخت اقداماتو پر اړتیا ټینګار وکړ.
بیلوسوف په سیمه کې د میشتو روسي او تاجک ځواکونو د پوځي همغږۍ او د جګړې د چمتووالي پر اهمیت هم ټینګار وکړ. هغه په تاجکستان کې د روسیې ۲۰۱ اډې ته اشاره وکړه چې په وروستیو کلونو کې یې له تاجکستان او نورو هېوادونو سره د افغانستان په پوله کې څو پوځي تمرینونه کړي دي.
بیلوسوف یادونه وکړه: "مهمه مسله دا ده چې موږ اوس په لومړۍ کرښه کې یو. د CSTO د غړو هیوادونو په سویلي سرحدونو کې وضعیت خورا ننګونکی دی."
هغه زیاته کړه، "سربیره پردې، په افغانستان کې شرایط او تمایلات مخ په خرابیدو دي؛ موږ یې څارو، پوهیږو چې څنګه یې اداره کړو، خو دا ټول زموږ د زیاتې پاملرنې او زیات چمتووالي ته اړتیا لري."
په افغانستان کې د طالبانو له واک ته د رسېدو وروسته، تاجکستاني چارواکو په وار وار په سیمه ییزو غونډو کې د افغانستان په شاوخوا کې د "امنیتي کمربند" د جوړولو غوښتنه کړې ده. په روسیه او د CSTO نورو غړو هیوادونو کې امنیتي اندیښنې مسکو ته نږدې د مارچ د 22 له برید وروسته د پام وړ لوړې شوې.
Comments
Post a Comment