د افغانستان د طالبانو لخوا یو امریکایی تبعه ګلیزمن خوشې شو

 یوې سرچینې د نوم نه ښودلو په شرط رسنیو ته ویلي، طالبانو په کابل کې د امریکا د برمته شوي استازي اډم بوهلر او طالب چارواکو ترمنځ له مخامخ خبرو وروسته یو امریکايي تبعه چې له دوو کلونو راهیسې په افغانستان کې بندي و، خوشې کړی دی.

سرچینې ویلي، جورج ګلیزمن چې په ۲۰۲۲ کال کې کابل ته د یوه ګرځندوی په توګه تللی و، د پنجشنبې په ماښام په یوه قطري الوتکه کې له افغانستان څخه د قطر په لور روان شو.

ګلیزمن او بوهلر تمه کیږي چې وروسته متحده ایالاتو ته سفر وکړي.

د متحده ایالاتو د بهرنیو چارو وزیر مارکو روبیو د پنجشنبې په ورځ یو بیان خپور کړ چې د ګلیزمن خوشې کول یې تایید کړل. په کابل کې د پنجشنبې د ورځې غونډه د جنورۍ په میاشت کې د امریکا د ولسمشر ډونلډ ټرمپ له واک ته رسېدو راهیسې د امریکا او طالبانو ترمنځ د مخامخ خبرو تر ټولو لوړه کچه بلل کېږي.

د افغانستان د بهرنیو چارو وزارت په یوه بیان کې ویلي، بوهلر د طالبانو د ادارې د بهرنیو چارو له وزیر امیرخان متقي سره وکتل.

په دې کتنه کې د افغانستان او امریکا پر دوه اړخیزو اړیکو، د بندیانو پر خلاصون او په امریکا کې افغانانو ته د قونسلګرۍ د خدمتونو د وړاندې کولو په اړه بحثونه وشول.